13th June, 2017
MZP PRESS RELEASE
Nimin 12th June 2017 zan dar 7:30 khan MZP chuan Pu Rajnath Singh, Minister of Home Affairs of India Mizoram lo kal chu lo hmuin Mizorama dan lova lo lut Chakma te pun chak dan chungchang thu leh dan lova Mizorama Chakma pem lut an tam thu Memorandum an lo thehlut a ni. Minister of Home Affairs of India Mizoram lo hmu hian Pu Lalsangzuala Ngente President hoin, L.Ramdinliana Renthlei General Secretary, Joseph K. Zohmingliana Asst. Gen. Secretary leh Lalnunmawia Pautu Treasurer ten pawl aiawhin an lo hmu a ni.
.
MZP chuan Rajnath Singh, Minister of Home Affairs of India hnenah hian Mizoramah dan lova awm Chakma an pun chak thu te, Mizorama Chakma pun chak dan hi chi inthlahpun vanga pung chak an nih loh thu leh hmun dang Bangladesh atanga dan lova lo pem lut an nih thu te kan thlen a, heng dan lova lo pem lutte hi dan anga haw tir an nih theih nana hma la turin kan ngen a ni.
.
MZP chuan Home Minister hnenah hian 2014 Sarkar laipui inthlan dawn a BJP Prime Ministerial Candidate Pu Narendra Modi-an inthlan campaign-a Assam a tlawh tuma dan lova pem lutte hnawhchhuah an nih tur thu a sawi thu leh Prime minister a nih chuan dan lova awm Foreigner te haw tir an ni ang a tih thu te tarlan a ni a. India Hmarchhak State te chu dan lova pem lutte avanga harsatna kan tawh nasat thu, a bikin Mizoram pawh a tuar nasa ber State kan nih thu te thlen a ni a, Prime Minister in hetiang thu Election campaign nana a sawi avanga kan beiseina a sang thu te thlen a ni.
.
MZP chuan dan lova Mizorama lo pem lut Chakma te hi Mizoram tan harsatna lian a tlin thu leh Mizoram mi an nih loh thu te leh History en pawh a tualchhung mi(Indigenous) an nih ngai loh thu te, British hun lai pawhin foreigner khuahkhirh na dan an siam a, chutah pawh chuan Chakma te chu foreigner anga dah an nih thu te, Chakma te hi hna an thawk peih a nih chuan kum khat an awm an lo phalsak thin thu te, heti chunga vawiina Mizoramah Chakma an tam ta em em mai chu MZP chuan mak kan tih thu Rajnath Singh hnenah hian lo thlen a ni bawk a. Chhiarpui hmasa ber 1901-ah Mizoramah Chakma mihring 198 chiah an awm thu leh 1991 chhiarpui-ah chuan 80000 an tlin tawh thu te leh kum 90 chhunga 44004 percent-a an pung thei chu mihring pun dan pangngai a nih loh thu te thlen a ni a, dan lova Mizorama pem lutte dang tur leh Mizoram him nana hma min laksak turin Union Home Minister hnenah hian lo thlen a ni.
.
(L.RAMDINLIANA RENTHLEI)
General Secretary
