MZP Chanchinbu hi MZP General Headquarters hmalakna peng pawimawh tak leh enkawl na hnuai a awm a ni. Kum 1938 khan MZP huruaitu hmasa (Mizo lehkhathiam hmasa) ten an lo tichhuak tan a, Shillong lam tang a enkawl a ni nghe nghe.
 |
| Registration Certificate |
Zirlai Pawl hi a tirah Lushai Students' Association tih a nih angin, LSA Chanchinbu tih a ni a, 1946 khan LSA hi Mizo Zirlai Pawl (MZP) ti a thlak a nih khan LSA Chanchinbu pawh MZP Chanchinbu ti a, a hming thlak a lo ni ta a ni.
Mizo thu leh hla (Literature) ah hian MZP Chanchinbu hian mellung pawimawh tak a lo phun tawh thin a, tun hma a Mizo te thu leh hla a phuar khawm tu leh kan tuihalna chhawktu pawimawh tak a lo ni tawh thin bawk.
Hman atangin he chanchinbu hian kalphung nghet a lo nei tawh sa a, chu chu thu leh hla kan tih hrang hrang te zau tak a khungluhna a ni. Kum 1970 chho khan MZP Chanchinbu tawp lamah YMA Chanchin a bet thin a, man chawi a la pawh 3000-4000 lai an tling hial thin a, a hunlai chuan Kristian Tlangau tih lohvah chuan chanchinbu darh zau ber a ni hial a sawi a ni.
Tun hma a chanchinbu chhuak te atang hian Mizoram awmdan chiang takin a hriat theih a, mahse Mizoram buai avang hian chhut (issued) tam tak haichhuah tur a awm tawhlo a ni. MZP Chanchinbu enkawl tawh tu te zingah Mizoram a thu leh hla a mi ril leh mi challang an tam tawh hle a, hei hian chanchinbu a ti hlu leh zual a ni.
Tunlai khawvel changkang tawh tak karah lehkhabu tha leh Chanchinbu hrang hrang changtlung tak tak chhuak tam tawh a, tunhma angin he chanchinbu hian hlut hlawh tawh lem lo mahse ngaina tu ala ngah hle a, harsatna hrang hrang; Indopui II na te, Mautam hmasa leh Mizoram buai ten ti bahlah mahse thi em lovin hruaitu hmasa ten an lo kalpui ve zel a, chuvangin a pawimawhna hriain tun thleng hian MZP General Headquarters chuan kut kenin ala ti chhuak hram hram zel a ni.
Nang pawh a hlut tu te zingah i tel avangin lawmthu kan sawi a. I thu leh hla te eng tik lai pawhin kan dawngsawng thei reng bawk a ni.
